Handhafar Grímuverðlauna 2011

UPPSKERUHÁTÍÐ sviðslistanna á Íslandi árið 2011, Gríman, var haldin fimmtudagskvöldið 16. júní í Borgarleikhúsinu og í beinni útsendingu á Stöð 2. Á hátíðinni voru Grímuverðlaunin veitt í níunda sinn í alls 16 flokkum sviðslista auk heiðursverðlauna Leiklistarsambands Íslands, sem eitt fremsta leikskáld þjóðarinnar um árabil, Oddur Björnsson, hlaut.

Sýning ársins 2011 var valin leiksýningin Lér konungur eftir William Shakespeare í sviðssetningu Þjóðleikhússins. Sýningin hlaut alls 6 Grímuverðlaun en hún var frumsýnd á stóra sviði Þjóðleikhússins annan jóladag, þann 26. desember 2010. Ástralski leikstjórinn Benedict Andrews hlaut verðlaunin fyrir leikstjórn og Arnar Jónsson var valinn leikari ársins í titilhlutverkinu. Leikararnir Atli Rafn Sigurðarson og Margrét Vilhjálmsdóttir hlutu Grímuna fyrir hlutverk sín í sýningunni og Hildur Ingveldardóttir Guðnadóttir hlaut Grímuna fyrir tónlistina í sýningunni.

SÝNING ÁRSINS
Leiksýningin Lér konungur eftir William Shakespeare í sviðssetningu Þjóðleikhússins. Leikstjórn annaðist Benedict Andrews.

LEIKSKÁLD ÁRSINS
Auður Jónsdóttir og Ólafur Egill Egilsson fyrir leikverkið Fólkið í kjallaranum í sviðssetningu Leikfélags Reykjavíkur og Borgarleikhússins.

LEIKSTJÓRI ÁRSINS
Benedict Andrews fyrir leikstjórn í leiksýningunni Lé konungi í sviðssetningu Þjóðleikhússins.

LEIKARI ÁRSINS Í AÐALHLUTVERKI
Arnar Jónsson fyrir hlutverk sitt í leiksýningunni Lé konungi í sviðssetningu Þjóðleikhússins.

LEIKKONA ÁRSINS Í AÐALHLUTVERKI
Unnur Ösp Stefánsdóttir fyrir hlutverk sitt í leiksýningunni Elsku barni í sviðssetningu Leikfélags Reykjavíkur og Borgarleikhússins.

LEIKARI ÁRSINS Í AUKAHLUTVERKI
Atli Rafn Sigurðarson fyrir hlutverk sitt í leiksýningunni Lé konungi í sviðssetningu Þjóðleikhússins.

LEIKKONA ÁRSINS Í AUKAHLUTVERKI
Margrét Vilhjálmsdóttir fyrir hlutverk sitt í leiksýningunni Lé konungi í sviðssetningu Þjóðleikhússins.

LEIKMYND ÁRSINS
Halla Gunnarsdóttir fyrir leikmynd í leiksýningunni Strýhærða Pétri í sviðssetningu Leikfélags Reykjavíkur og Borgarleikhússins.

BÚNINGAR ÁRSINS
Filippía I. Elísdóttir fyrir búninga í leiksýningunni Ofviðrinu í sviðssetningu Leikfélags Reykjavíkur og Borgarleikhússins.

LÝSING ÁRSINS
Björn Bergsteinn Guðmundsson fyrir lýsingu í leiksýningunni Ofviðrinu í sviðssetningu Leikfélags Reykjavíkur og Borgarleikhússins.

TÓNLIST/HLJÓÐMYND ÁRSINS
Hildur Ingveldardóttir Guðnadóttir fyrir tónlist í leiksýningunni Lé konungi í sviðssetningu Þjóðleikhússins.

SÖNGVARI ÁRSINS
Ólafur Kjartan Sigurðarson fyrir hlutverk sitt í óperunni Rigoletto í sviðssetningu Íslensku óperunnar.

DANSARI ÁRSINS
Gunnlaugur Egilsson fyrir hlutverk sitt í danssýningunni Bræðrum í sviðssetningu Pars Pro Toto í samstarfi við Listahátíð í Reykjavík og Þjóðleikhúsið.

DANSHÖFUNDUR ÁRSINS
Valgerður Rúnarsdóttir og hópurinn fyrir kóreógrafíu í danssýningunni Eyjaskeggi í sviðssetningu Reykjavik Dance Festival.

BARNASÝNING ÁRSINS
Brúðuleiksýningin Gilitrutt eftir Bernd Ogrodnik í samvinnu við Benedikt Erlingsson í sviðssetningu Brúðuheima. Leikstjórn annaðist Benedikt Erlingsson.

ÚTVARPSVERK ÁRSINS
Útvarpsleikritið Djúpið eftir Jón Atla Jónasson. Leikari Ingvar E. Sigurðsson. Tónlist Hilmar Örn Hilmarsson. Hljóðsetning Einar Sigurðsson. Leikstjórn annaðist Jón Atli Jónasson.

HEIÐURSVERÐLAUN LEIKLISTARSAMBANDS ÍSLANDS
Leikskáldið Oddur Björnsson fyrir framúrskarandi ævistarf í þágu leiklistar.

ÁHORFENDAVERÐLAUNIN

Leiksýningin Nei, ráðherra! í sviðssetningu Leikfélags Reykjavíkur og Borgarleikhússins. Sýningin hlaut flest atkvæði í símakosningu um sýningu ársins að mati áhorfenda.

Þær fjórar sýningar sem einnig komu til greina voru Gói og Eldfærin í sviðssetningu Baunagrassins og Borgarleikhússins, Húsmóðirin í sviðssetningu Vesturports og Borgarleikússins, Rocky Horror í sviðssetningu Leikfélags Akureyrar og Strýhærði Pétur í sviðssetningu Leikfélags Reykjavíkur og Borgarleikhússins.

Fjöldi sviðsstjarna kemur fram á Grímuhátíðinni í Borgarleikhúsinu

GRÍMUHÁTÍÐIN 2011 verður haldin í stóra sal Borgarleikhússins fimmtudaginn 16. júní. Hátíðin hefst með fordrykk í forsal leikhússins kl. 18.30 en bein útsending hefst stundvíslega kl. 19.30 á Stöð 2. Þeir sem hafa tryggt sér aðgöngumiða á hátíðina mega eiga von á skemmtilegu og glæsilegu kvöldi að vanda, en hátíðin er nú haldin í níunda sinn. 

Aðalkynnar hátíðarinnar í ár verða leikararnir ljúfu Gunnar Hansson og Katla Margrét Þorgeirsdóttir, en í gegnum árin hafa kynnar Grímunnar ávallt vakið athygli fyrir líflega og uppátækjasama framkomu.

Ásamt þeim Gunnari og Kötlu kemur fjöldi sviðslistastjarna fram á hátíðinni. Einnig verða á boðsstólnum fjörug skemmtiatriði, m.a. frá Þjóðleikhúsinu, Borgarleikhúsinu, Sjálfstæðu leikhúsunum, Íslensku óperunni og Íslenska dansflokknum.

Meðal stjarnanna sem afhenda verðlaun á hátíðinni má nefna leikarana Selmu Björnsdóttur, Egil Ólafsson, Eddu Björgvins, Víking Kristjánsson, Ingvar E. Sigurðsson, Theódór Júlíusson, Maríu Hebu, Magnús Ólafs, Esther Talíu, Þórunni Ernu Clausen, Vigni Rafni Valþórs, Þórunni Örnu Kristjáns ofl.

Þá munu dansarar Íslenska dansflokksins Katrín Ingvadóttir og Valgerður Rúnarsdóttir stíga á stokk og afhenda verðlaun sem og leikhússtjórar stóru leikhúsanna tveggja, Tinna Gunnlaugsdóttir þjóðleikhússtjóri og Magnús Geir Þórðarson borgarleikhússtjóri.

Grímuhátíðin var fyrst haldin árið 2003 en það er Leiklistarsamband Íslands, heildarsamtök sviðslistanna á Íslandi, sem hefur veg og vanda að Grímuverðlaununum. Veitt verða verðlaun í 16 flokkum sviðslista auk þess sem heiðursverðlaun Leiklistarsambands Íslands verða veitt þeim listamanni er skilað hefur framúrskarandi ævistarfi í þágu sviðslista.

100 boðsmiðar á Grímuhátíðina 2011

100 BOÐSMIÐAR fyrir þig á Grímuhátíðina 2011! Leiklistarsamband Íslands hefur ákveðið að gefa 100 boðsmiða fyrir almenna leikhúsgesti og þá sem hafa áhuga að taka þátt í fjörinu í salnum á Grímuhátíðinni 2011. Hátíðin sem verður glæsileg að vanda, verður haldin fimmtudaginn 16. júní í Borgarleikhúsinu, í beinni útsendingu á Stöð 2 og hefst með fordrykk kl. 18.30. Miðarnir verða gefnir þeim 50 gestum sem fyrst senda tölvupóst á miðasöluna í Borgarleikhúsinu. Tveir miðar á mann! Nú er um að gera að nota tækifærið, baða sig í kastljósinu, hitta sviðslistastjörnurnar og njóta kvöldsins í góðum félagsskap. Netfangið er midasala@borgarleikhus.is - Góða skemmtun!